Սթրոս Կանի դերում Դեպարդիեին հնարավոր կլինի տեսնել սոսկ Համացանցում
ԵՐԵՎԱՆ, 21 ԱՊՐԻԼԻ, ԱՐՄԵՆՊՐԵՍ: Ժերար Դեպարդիեի մասնակցությամբ «Բարի գալուստ Նյու Յորք» կինոժապավենը կցուցադրեն սոսկ Համացանցում: Այս մասին, ինչպես տեղեկացնում է «Արմենպրես»-ը, հայտարարել է ֆիլմի պրոդյուսեր Վենսան Մարավալը:
«Քանի որ Ֆրանսիայի գործող օրենսդրությունն արգելում է միաժամանակյա վարձույթ կինոդահլիճներում եւ այլ տեսակի դիստրիբուցիաներ, մենք ընտրեցինք Համացանցը: Միեւնույն ժամանակ մյուս երկրներում, մասնավորապես, ԱՄՆ-ում, «Բարի գալուստ ՆյուՅորք» ֆիլմը միաժամանակ կցուցադրվի դահլիճներում եւ Համացանցում»,- հայտարարել Է պրոդյուսերը:
Նրա խոսքով՝ կինոժապավենը, որտեղ ֆրանսիացի դերասան եւ Ռուսաստանի քաղաքացի Ժերար Դեպարդիեն խաղացել Է Արժույթի միջազգային հիմնադրամի նախկին կարգադրիչ տնօրեն Դոմինիկ Սթրոս Կանի դերը, հնարավոր կլինի համաշխարհային ցանցում դիտել արդեն մայիսին՝ Կաննի կինոփառատոնի ժամանակ: Դիտման արժեքը կկազմի 7 եվրո:
Հիշեցնենք, որ ամերիկացի ռեժիսոր Աբել Ֆեռարան 2012 թվականի փետրվարին հայտարարել Էր ԱՄՀ-ի կարգադրիչ տնօրենի մասնակցությամբ վերջին տարիների ամենաաղմկահարույց սեքսուալ սկանդալներից մեկի մոտիվներով ֆիլմ նկարահանելու մտադրության մասին:
Նյու Յորքի ոստիկանությունը Սթրոս Կանին ձերբակել Է 2011 թվականի մայիսի 14-ին տեղի «Սոֆիտել» հյուրանոցի սպասուհուն բռնաբարելու կասկածանքով: 5 օր հետո նա պաշտոնաթողություն Է խնդրել, հաղորդել Է «Ուկրինֆորմը»:
Բաժանորդագրվեք մեր ալիքին Telegram-ում