Վրաստանն ու Ռուսաստանը կքննարկեն մշտական չվերթների վերականգնման հնարավորությունները
ԵՐԵՎԱՆ, 20 ԱՊՐԻԼԻ, ԱՐՄԵՆՊՐԵՍ: Վրաստանի և Ռուսաստանի ավիացիոն ծառայությունների ներկայացուցիչները կհանդիպեն` քննարկելու երկու երկրների միջև ուղիղ չվերթների վերականգնմանը վերաբերող հարցեր: «Արմենպրես»-ի հաղորդմամբ` ինչպես տեղեկացնում է ԻՏԱՐ-ՏԱՍՍ-ը` այդ մասին տեղական հեռուստաընկերություններից մեկի հետ զրույցում ասել է ՌԴ-ի հետ փոխհարաբերությունների հարցերով Վրաստաի վարչապետի հատուկ ներկայացուցիչ Զուրաբ Աբաշիձեն:
Ադաշիձեն տեղեկացրել է, որ ուղիղ ավիաչվերթների վերականգնման վերաբերյալ հարցերը քննարկվել են ՌԴ ԱԳ փոխնախարար Գրիգորի Կարասիմի հետ ապրիլի 16-ին Պրահայում կայացած հանդիպման ժամանակ:
ՌԴ ԱԳ հատուկ ներկայացուցիչ Ալեքսանդր Լուկաշևիչը մարտի 25-ին հայտարարել էր, որ «Վրաստանի հետ հարաբերությունների կարգավորմանը զուգահեռ հնարավորություն է ստեղծվել քննարկելու նաև ուղիղ չվերթների վերականգնման հարցերը»: «Երկու երկրների ավիացիոն վարչությունների ներկայացուցիչների առաջին հանդիպումը ցույց տվեց, որ լուրջ խոչընդոտներ չկա»,- հայտարարել էր նա: «Ցավոք, հետագայում դադար տեղի ունեցավ, բայց եթե վարչությունները կրկին ակտիվանան, ապա կարելի է շատ արագ վերականգնել դեպի Վրաստան մշտական չվերթները»,- հայտարարել էր Լուկաշևիչը:
Ռուսաստանի և Վրաստանի միջև մշտական չվերթները դադարեցվել են 2008թ:
Բաժանորդագրվեք մեր ալիքին Telegram-ում