«Թվիթեր»-ի փոխնախագահ Րաֆֆի Գրիգորյանը բաց դասախոսությամբ է հանդես գալիս «Թումո»-ում. ՈՒՂԻՂ
ԵՐԵՎԱՆ, 18 ԱՊՐԻԼԻ, ԱՐՄԵՆՊՐԵՍ: «Թվիթեր» միկրոբլոգի փոխնախագահ Րաֆֆի Գրիգորյանը հյուրընկալվել է «Թումո» ստեղծարար տեխնոլոգիաների կենտրոնում, որտեղ ներկայացնում է իր «Այն, ինչ կարևոր է» դասախոսությունը: Բաց դասախոսությունը ծրագրային մշակման կառավարման թեմայով է, որի ընթացքում կներկայացնի «Թվիթեր»-ում իր աշխատանքային փորձառությունը:
Րաֆֆի Գրիգորյանը Հայաստանում է «Թումո»-ում համալսարանի ուսանողների և ՏՏ ոլորտի մասնագետների համար ծրագրավորման առաջավոր դասընթաց վարելու նպատակով: Րաֆֆի Գրիգորյանն առաջին անգամ «Թումո» ստեղծարար տեխնոլոգիաների կենտրոն է այցելել 2012 թվականին:
Որպես «Թվիթեր»-ի` տեղեկատվական տեխնոլոգիաների ոլորտի առաջնորդ՝ Գրիգորյանը ղեկավարել է ընկերության ծառայությունների ինտեգրումը Apple-ի iOS մոբայլ համակարգին եւ օգնել ստեղծելու գեոլոկացիոն ծրագիրը: Այսօր նա ընկերությունում ղեկավարում է ավելի քան հինգ տարբեր խմբեր եւ պատասխանատու է սոցիալական ցանցի ծրագրային ենթակառույցների համար: Նախքան «Թվիթեր»-ին միանալը Գրիգորյանը համահիմնադրել է WattzOn.com-ը՝ ստարտափ ընկերությունը, որը Business Week ամսագիրն անվանել էր 2008թ. լավագույն գաղափար: Նա դասավանդել է Նյու Յորքի համալսարանի Ինտերակտիվ հեռահաղորդակցության բաժնում, ինչպես նաև O'Reilly Media-ի հրատարակած "TiVo Hacks" գրքի հեղինակն է և Մասաչուսեթսի տեխնոլոգիական ինստիտուտի «Մեդիա լաբ»-ի նախկին անդամը:
Գրիգորյանն ապրիլի 17-ին հյուրընկալվել էր նաև ՀՀ նախագահ Սերժ Սարգսյանի մոտ:
Բաժանորդագրվեք մեր ալիքին Telegram-ում