Մեկնարկել են Արցախի համայնքապետերի համար նախատեսված հերթական դասընթացները
ՍՏԵՓԱՆԱԿԵՐՏ, 16 ԱՊՐԻԼԻ, ԱՐՄԵՆՊՐԵՍ-ԱՐՑԱԽՊՐԵՍ: ԼՂՀ կառավարության շենքում արդեն երրորդ օրն է, ինչ ընթանում են համայնքների ղեկավարների սեմինար-դասընթացները,որոնք ունեն համայնքների ղեկավարների՝ տեղական նշանակության հարցերը լուծելու և սեփականությունը տնօրինելու կարողությունների, կառավարչական հմտությունների զարգացմանը նպաստելու նպատակ: «Արմենպրես»-ի հաղորդմամբ` ինչպես «Արցախպրես»-ի թղթակցի հետ զրույցում նշել է ԼՂՀ կառավարության աշխատակազմի տարածքային կառավարման և վերաբնակեցման վարչության տեղական ինքնակառավարման բաժնի վարիչ Տիգրան Աթանեսյանը, այս տարվա սեմինար-դասընթացների երկրորդ փուլին մասնակցում են 25 համայնքների ղեկավարներ:
Համայնքների ղեկավարների համար նախատեսված սեմինար-դասընթացների թեմաններն, ըստ Աթանեսյանի, վերաբերում են ԼՂՀ Սահմանադրության, ԼՂՀ տարածքային կառավարման և տեղական ինքնակառավարման համակարգի, իրավական հսկողության և պետական վերահսկողության, համայնքի քառամյա զարգացման, համայնքի ղեկավարի գործունեության հասարակական կարգի պահպանության բնագավառին և այլ հարցերի:
«Սեմինար դասախոսությունների կազմակերպման նպատակը համայնքների ղեկավարների լիազորությունների բարձրացրած հարցերի, հասարակական կարգի պահպանման, գլխավոր ուղղությունների հարցերի լուծումն է, որոնք առնչություն ունեն համայնքի բնակչության հետ»,-ասել է Տիգրան Աթանեսյանը՝ նշելով, որ յուրաքանչյուր դասախոսության համար ընտրված է համապատասխան ոլորտի ներկայացուցիչ:
Բաժանորդագրվեք մեր ալիքին Telegram-ում