Լեհաստանի «Զամոշ» կենդանաբանական այգու տնօրենը զարմացած է Երևանի կենդանաբանական այգու թունավոր օձերի բազմազանությամբ
ԵՐԵՎԱՆ, 12 ՆՈՅԵՄԲԵՐԻ, ԱՐՄԵՆՊՐԵՍ: Երեւանի կենդանաբանական այգին մեծացնելու, ինչպես նաև զարգացնելու մեծ հնարավորություններ կան: Կենդանաբանական այգի այցի ընթացքում նման տեսակետ է հայտնել Լեհաստանի «Զամոշ» կենդանաբանական այգու տնօրեն Լուկաշ Սուլովսկին, ում կարծիքով, այգու առաջնահերթ խնդիրը երկկողմանի ճանապարհի կառուցումն է, որպեսզի այգում շրջելն այցելուների համար առավել հարմարավետ լինի:
Ինչպես «Արմենպրես»-ին տեղեկացրին Երևանի կենդանաբանական այգու մամուլի ծառայությունից, Սուլովսկուն հատկապես դուր էր եկել հայկական մուֆլոնների նոր ազատավանդակը, որը, նրա գնահատմամբ, համապատասխանում է կենդանու կենսապայմանների ապահովման միջազգային բոլոր չափանիշներին:
Ի տարբերություն հայկական մուֆլոնների` կենդանաբանական այգու առյուծների ներկայիս պայմանները, Լուկաշ Սուլովսկու գնահատմամբ, անբավարար են և չեն համապատասխանում եվրոպական չափորոշիչներին: Փոխարենը` նա վագրերի նոր կառուցվող ազատավանդակը համարում է գեղեցիկ, բնական և միջազգային չափանիշներին համապատասխան:
Լեհաստանի «Զամոշ» կենդանաբանական այգու տնօրենը հաճելիորեն զարմացած էր Երևանի կենդանաբանական այգու թունավոր օձերի բազմազանությամբ:
Որպես կենդանաբանական այգու տնօրեն` Լուկաշ Սուլովսկին հասկանում է, թե ինչ մեծ ֆինանսական ռեսուրսներ են պահանջվում կենդանաբանական այգին հիմնովին վերափոխելու և այն միջազգային չափանիշներին համապատասխանեցնելու համար, բայց, տեսնելով այգում իրականացված աշխատանքները, համոզմունք է հայտնել, որ մի օր այցելուներն արդեն կտեսնեն լիովին բարեկարգ և ժամանակակից կենդանաբանական այգի:
Ըստ Լուկաշ Սուլովսկու` Երևանի կենդանաբանական այգու հետ համագործակցելու ցանկությունը շատ մեծ է, և ինքն ու այգու տնօրեն Ռուբեն Խաչատրյանն արդեն քննարկել են մի շարք գաղափարներ, որոնք կարելի է համատեղ իրականացնել: Սուլովսկին հույս ունի, որ ֆինանսական հարցերի կարգավորման դեպքում դրանք կյանքի կկոչվեն:
Լեհաստանի «Զամոշ» կենդանաբանական այգու տնօրենը Երևանի կենդանաբանական այգու աշխատակիցների համար մասնագիտական դասընթացներ է անցկացրել, ինչպես նաև մի շարք խորհուրդներ է տվել նոր տեխնոլոգիաների կիրառման, ազատավանդակների ձևավորման կապակցությամբ:
Բաժանորդագրվեք մեր ալիքին Telegram-ում