Հայոց ցեղասպանության մասին 100-ամյա տարելիցին ընդառաջ հայ-ֆրանսիական անիմացիոն ֆիլմ կնկարահանվի
ԵՐԵՎԱՆ, 30 ՀՈԿՏԵՄԲԵՐԻ, ԱՐՄԵՆՊՐԵՍ: Հայոց ցեղասպանության մասին, 100-ամյա տարելիցին ընդառաջ, պետք է բարձրաձայնել նաև անիմացիոն ֆիլմի տեսքով: «ՌեԱնիմանիա» փառատոնի տնօրեն Վրեժ Քասունու գաղափարով կնկարահանվի «Հայաստանցի մեծ մայրիկը» հայ-ֆրանսիական համատեղ անիմացիոն ֆիլմը, որի սցենարի հեղինակը ֆրանս-աջարացի Ֆարիդ Բուջիդան է: Հոկտեմբերի 30-ին հրավիրված ասուլիսում, պատասխանելով «Արմենպրես»-ի հարցին, Քասունին տեղեկացրեց, որ հայ-ֆրանսիական նախագիծի վրա արդեն մեկնարկել են աշխատանքները: «Ֆիլմ ստեղծելու թույլտվությունն արդեն կա, ֆիլմը լինելու է ֆրանսերեն, միայն հերոսն է խոսելու հայերեն: Այն հիմնված է իրական պատմության վրա»,- պատմեց նա :
Հայաստանում Ֆրանսիայի արտակարգ և լիազոր դեսպան Անրի Ռենոն Հայոց ցեղասպանության 100-ամյակի ոգեկոչման համար անհրաժեշտ է համարում անիմացիոն ֆիլմաշարի ստեղծումը, որը կարծես հետադարձ հայացք կլինի անցած տարիների ընթացքում մազապուրծ եղած մի ընտանիքի պատմությանը: Նրա խոսքով` նախաձեռնությունն առաջին հերթին միտված կլինի երիտասարդությանը, հաջորդ սերունդներին: Դեսպանի գնահամամբ` չնայած նրան, որ ֆիլմը կներկայացնի կարոտի գաղափարը, սակայն դրա հաջողությունը ապահովված կլինի: «Արժե նման գաղափարը իրականացնել»,- հավելեց դիվանագետը:
Հավանություն տալով գաղափարին` Անրի Ռենոն նշեց, որ կինոարտադրության ոլորտում հայ-ֆրանսիական համագործակցությունը զարգացում կապրի նաև այս նախագծի շնորհիվ:
«Հայաստանցի մեծ մայրիկը» ֆիլմում կներկայացվի Հայոց ցեղասպանությունը վերապրած մի կնոջ` հեղինակի մոր, պատմությունը: Կինոնախագիծն այժմ վերջնամշակման փուլում է, իրականացման պաշտոնական մեկնարկը կտրվի 2014 թվականին:
Բաժանորդագրվեք մեր ալիքին Telegram-ում