«ՌեԱնիմանիան» սերտացրել է հայ-ֆրանսիական համագործակցությունն անիմացիոն ֆիլմարտադրության ոլորտում
ԵՐԵՎԱՆ, 30 ՀՈԿՏԵՄԲԵՐԻ, ԱՐՄԵՆՊՐԵՍ: Անիմացիոն ֆիլմերի ստեղծման ասպարեզում աշխատող Հայաստանի և Ֆրանսիայի մասնագետները փորձի փոխանակման լայն հնարավորություն են ունեցել Երևանում անցկացվող «ՌեԱնիմանիա» միջազգային փառատոնի շրջանակում: Հոկտեմբերի 30-ին հրավիրված ասուլիսում Հայաստանում Ֆրանսիայի արտակարգ և լիազոր դեսպան Անրի Ռենոն նշեց, որ «ՌեԱնիմանիայի» անցկացումն առավել արդյունավետ է դառնում նաև ֆրանսիացի մասնագետների ներգրավվածության շնորհիվ: «Շատ օգտակար է, երբ փառատոնի ընթացքում ֆրանսիական անիմացիայի ամենակարկառուն ներկայացուցիչները իրենց ասելիքն են փոխանցում Հայաստանին»,- «Արմենպրես»-ի հաղորդմամբ` ասաց Ռենոն: Նրա խոսքով` անիմացիան այն ոլորտն է, որտեղ Ֆրանսիան առաջատար դիրք է գրավում, և ֆրանսիական արտադրանքի շուրջ 5 տոկոսն արտահանվում է դեպի եվրոպական երկրներ:
Դիվանագետի գնահատմամբ` անիմացոն ֆիլմը կինոարտադրության այն տեսակն է, որն առաջին հերթին ուղղված է երիտասարդ հանդիսատեսին: Նա շնորհավորեց փառատոնի առթիվ և հույս հայտնեց, որ հայ-ֆրանսիական համագործակցությունը առաջիկայում զարգացում կապրի նաև անիմացիայի ոլորտում:
«Անսի» անիմացիոն ֆիլմերի ամենամյա միջազգային փառատոնի (Festival d’Annecy) տնօրեն Տիցիանա Լոշին, ով ֆրանսիական պատվիրակության հետ ժամանել է Հայաստան, դրական և հեռանկարային է համարում Հայաստանում «ՌեԱնիմանիա» փառատոնի անցկացումը:
«Ցանկանում եմ իմ երախտիքի խոսքն ուղղել «ՌեԱնիմանիայի» տնօրեն Վրեժ Քասունուն` իր անմիջական կազմակերպչական մոտեցման համար: Մեզ համար մեծ հետաքրքրություն են ներկյացրել փառատոնի շրջանակում տեղի ունեցած կարծքիների փոխանակումները, երիտասարդ արվեստագետների հետ հանդիպումները»,- նշեց Լոշին:
Նա շեշտեց, որ նման փառատոնները նպաստում են անիմացիայի ոլորտում նոր անունների ի հայտ գալուն: «Անսի» անիմացիոն ֆիլմերի ամենամյա միջազգային փառատոնի տնօրենը տեղեկացրեց, որ Ֆրանսիան անիմացիոն ոլորտում իր տեղը զիջում է միայն ԱՄՆ-ին և Ճապոնիային: «ՌեԱնիմանիա» փառատոնի տնօրեն Վրեժ Քասունին էլ նշեց, որ յուրաքանչյուր տարի փոխվում և նորացվում է մոտեցումը փառատոնի անցկացման հարցին:
«Փառատոնի նկատմամբ հետաքրքրությունն աճել է: Դրա ապացույցը հենց բացման արարողությունն էր, որի ժամանակ դահլիճը երկու անգամ նախատեսվածից ավելի լեցուն էր»,- ասաց Քասունին` ընդգծելով, որ «ՌեԱնիմանիան» միտված է կոտրելու այն թյուր կարծրատիպը, որ անիմացիոն ֆիլմերը միայն մանկական լսարանի համար են նախատեսված: Փառատոնի տնօրենը շնորհակալություն հայտնեց նաև Հայաստանում Ֆրանսիայի դեսպանատանը, որն առաջին իսկ օրվանից աջակցել է և իր գործուն մասնակցությունն է ունեցել փառատոնի անցկացման գործում:
Քասունին նաև շեշտեց, որ փառատոնի կազմկոմիտեի համար ֆրանսիացիների հետ հետագա համագործակցության հիմք է հանդիսանալու նաև այն փաստը, որ Տիցիանա Լոշին հայկական արմարտներ ունի:
«Մենք իմացանք, որ տիկին Լոշիի մայրը հայ է, և սա հիմք է հանդիսանում կարծելու, որ գուցե ինքն էլ ցանկանա ֆիլմ նկարահանել Հայաստանի մասին»,- ավելացրեց նա:
Մարկ Բորեալի և Տիբու Շատելի «Իմ մայրիկն Ամերիկայում է և հանդիպել է Բաֆֆալո Բիլին» ֆիլմի պրեմիերայով հոկտեմբերի 26-ին մեկնարկել է «ՌեԱնիմանիա» 5-րդ միջազգային կինոփառատոնը, որն այս տարի նվիրված է հայկական անիմացիայի 75-ամյակին: Փառատոնի ընթացքում հանդիսատեսը հնարավորություն է ունեցել դիտել 212 ֆիլմ 70 երկրից:
«ՌեԱնիմանիան» առաջին անգամ նոյեմբերի 1-3-ը իր աշխատանքը կշարունակի նաև Արցախում:
Բաժանորդագրվեք մեր ալիքին Telegram-ում