ԹԵՀՐԱՆ, 22 ՓԵՏՐՎԱՐԻ, ԱՐՄԵՆՊՐԵՍ: Իրանի խորհրդարանի արտաքին քաղաքականության եւ ազգային անվտանգության հանձնաժողովի փոխնախագահ Իսմայիլ Քովսարին Fars լրատվական գործակալությանը տված հարցազրույցում Ադրբեջանին մեղադրել է իրանցի երիտասարդ միջուկագետ Մուստաֆա Ահմադի Ռովշանիի դեմ իրագործված ահաբեկչությանը մասնակից լինելու մեջ: Նաթանզի միջուկային կենտրոնի առեւտրի բաժնի ղեկավարի տեղակալ, 32-ամյա Մուստաֆա Ահմադին Թեհրանում սպանվել է այս տարվա հունվարի 11-ին:

Ինչպես հաղորդում է «Արմենպրես»-ը` վկայակոչելով «Ազադլըգ» թերթը, Իսմայիլ Քովսարին այդ հայտարարությունն արել է Ադրբեջանի ազգային անվտանգության նախարարարության` «Սեփահ»-ի ղեկավարությամբ Բաքվում օտարերկրյա քաղաքացիների դեմ ահաբեկչության պատրաստվող զինված խմբի անդամներին վնասազերծելու մասին տարածած հայտարարությունից մեկ օր հետո:

Ադրբեջանական Media forum լրատվական կայքը հայտնել է, որ Իսմայիլ Քովսարին միանգամայն ապատեղեկատվություն է բնութագրել Բաքվում «Սեփահ»-ին կից զինված խմբին վնասազերծելու մասին տարածված տեղեկությունը եւ ասել, որ Իրանի դեմ նման մեղադրանքներ առաջ քաշելով, Ադրբեջանի պաշտոնյաներն աշխատում են «պարզապես առաջանցիկ լինել»:

«Առկա փաստաթղթերը վկայում են, որ օգնություն ցուցաբերելով Իսրայելի Mossad-ին եւ ԱՄՆ դաշնային հետախուզությունների բյուրոյին, Ադրբեջանի Հանրապետությունը մասնակից է երիտասարդ միջուկագետ Մուստաֆա Ռովշանիի սպանությանը: Լրտեսական կազմակերպություններին ցուցաբերած օգնությունը քողարկելու համար Ադրբեջանի պաշտոնյաները հայտարարում են, թե Իրանին կից ահաբեկչական խմբի անդամներ են ձերբակալել», -ասել է իրանցի պաշտոնյան:

Դիտվել է 85 անգամ