ԵՐԵՎԱՆ, 22 ՓԵՏՐՎԱՐԻ, ԱՐՄԵՆՊՐԵՍ: Հայաստանի Հանրապետության կրթության եւ գիտության նախարարությունը միջպետական համաձայնագրերի շրջանակում հայտարարել է մրցույթներ 2012-2013 ուսումնական տարում օտարերկրյա բարձրագույն ուսումնական հաստատություններում կրթություն ստանալու համար:                                                      

   Ինչպես հաղորդում է «Արմենպրես»-ը, Լեհաստանի Հանրապետության  բարձրագույն ուսումնական հաստատություններում բոլոր մասնագիտություններով է մրցույթը հայտարարված` բացառությամբ բժշկություն եւ արվեստ,  բուհական եւ հետբուհական կրթություն ստանալու համար 6 կրթաթոշակ՝  2 բակալավրիատ, 2 մագիստրատուրա, 2 ասպիրանտուրա:

Բուլղարիայի Հանրապետության բարձրագույն ուսումնական հաստատություններում հայտարարվել է բուհական կրթության 4 կրթաթոշակ՝ 2 բակալավրիատ, 2 մագիստրատուրայի համար մրցույթ:                  Ռումինիայի բարձրագույն ուսումնական հաստատություններում հայտարարվել է բուհական կրթության 6 կրթաթոշակ՝ 3 բակալավրիատ, 3 մագիստրատուրա  2 հետբուհական:
Ռումինիայի եւ Բուլղարիայի բուհերում սովորելու համար առաջնահերթությունը կտրվի կրթության եւ գիտության զարգացման համար գերակա հանդիսացող մասնագիտություններին:                                       Ռումինիայի բուհերում սովորելու համար մագիստրատուրայի 2 տեղ կտրամադրվի աստվածաբանություն մասնագիտությանը:

Դիտվել է 144 անգամ