ԵՐԵՎԱՆ, 26 ՀՈՒՆՎԱՐԻ, ԱՐՄԵՆՊՐԵՍ:ՄԱԿ-ի հրապարակված տվյալների համաձայն` Հայաստանի «Մարդկային զարգացման միջազգային կենտրոն» կազմակերպությունը դասվել է աշխարհի 50, Արեւելյան Եվրոպայի 25 լավագույն վերլուծական կենտրոնների թվին: Ինչպես «Արմենպրես»-ի հետ զրույցում նշեց «Մարդկային զարգացման միջազգային կենտրոն» -ի գործադիր տնօրեն Թեւան Պողոսյանը, դա մեծապես կխթանի կենտոնի գործունեությունը: Նրա խոսքով, ՄԱԿ-ի կողմից պատվիրվել էր աշխարհի վերլուծական կենտրոնների գործունեությունն ուսումնասիրել, որի հիման վրա էլ առանձնացվել են լավագույնները: Գնահատվել են վերլուծական կենտրոնների կատարված աշխատանքները, ձեռքբերված հաջողությունները, ճանաչվածությունը: «Սա կարեւոր է ոչ միայն մեր, այլեւ մեր երկրի համար: Մեր գործունեության արդյունքում բարձրացվեց մեր պետության հեղինակությունը: Լավագույն վերլուծական կենտրոն ճանաչվելը նաեւ պարտավորեցնող է»,-ասաց Թ. Պողոսյանը: Նշենք, որ աշխարհում ամենահեղինակավոր վերլուծական կենտրոն է ճանաչվել Վաշինգտոնում գտնվող «Brookings Institution»-ը, որը մասնագիտացված է քաղաքական, տնտեսական, հասարակական գիտությունների բնագավառներում: Լավագույնների թվում են նաեւ Ռուսաստանի, Գերմանիայի, Բելգիայի, Շվեդիայի, Ֆրանսիայի ինստիտուտները: