Գրավոր խոսք
Այս գիրքը օգնում է գրել գրագետ հայերեն տեքստեր:
Ի՞նչ է գրավոր խոսքը, ի՞նչ տեսակներ ու ժանրաձևեր ունի այն, դրանցից որը որտե՞ղ օգտագործել:
Հնարավոր չէ ապրել առանց գրավոր խոսքի: Դպրոցական շարադրությունից և փոխադրությունից մինչև բուհում ռեֆերանտ, կուրսային ու ավարտական աշխատանքներ և ատենախոսություն, գրավոր խոսքը յուրաքանչյուրի կյանքում կարևոր դեր ունի:
Աշխատանքային գործունեությունը հնարավոր չէ պատկերացնել առանց դիմումի, հրամանի, բնութագրի, կարծիքի, արձանագրության, պաշտոնական նամակի:
Քաղաքացիական հարաբերություններում անխուսափելի են պայմանագիրը, լիազորագիրը, կտակը:
Ամեն օր մարդիկ առնչվում են տեղեկատվության փոխանցման տարբեր ձևերի` նամակի, հայտարարության, լրագրային ռեպորտաժի:
Լիարժեք հասարակական կյանքն անհնար է առանց հրապարակախոսական կամ գիտական մտքի, արտահայտված հոդվածով, գրախոսությամբ, պատմվածքով:
Յուրաքանչյուր ոք իր կյանքի տարբեր փուլերում կարիք է ունենում գրավոր խոսքի տարբեր ձևերի գործածության, և գրագետ շարադրած գրավոր խոսքը կարող է շատ կարևոր նշանակություն ունենալ ուսման և աշխատանքի հաջողության համար:
«Գրավոր խոսք» գիրքը այսպիսի շուրջ ինը տասնյակ տեքստերի մասին է՝ օրինակներով և բացատրությամբ, թե ինչպես գրել, ինչ բովանդակությամբ և ինչ ձևավորումով և ոճական ինչ առանձնահատկություններով: Բազմավաստակ գիտնական հեղինակը հստակ բացատրում է, թե ինչպես պետք է խուսափել լեզվա-ոճական, քերականական, ուղղագրական ու կետադրական սխալներից, ինչպես շարադրել ու խմբագրել տեքստը:
Գիրքն ունի նաև գործնական քերականության, ուղղագրության ու կետադրության բաժին:
«Գրավոր խոսքը» ՀՀ ԿԳ նախարարության կողմից հաստատված է որպես ուսումնական ձեռնարկ հանրակրթական դպրոցի ու բուհերի ուսանողների համար, սակայն գրավոր խոսքի տարաբնույթ տեքստերի ընդգրկումը, դրանց գրության օրինակելի ձևերի հիշեցումը և գործնական քերականության մատչելի շարադրանքը գիրքը դարձնում են ձեռնարկ բոլորի համար: